Azərbaycan və Türkiyə ticarətin inkişafına, qarşılıqlı investisiyalara və beynəlxalq bazarlara birgə çıxışa xüsusi diqqət yetirərək iqtisadi əməkdaşlığı yeni səviyyəyə çatdırmağı hədəfləyir.
Trend-in məlumatına görə, Türkiyənin Azərbaycandakı səfirliyinin baş ticarət müşaviri Gülizar Yavaş iki ölkə arasında işgüzar əlaqələrin genişləndirilməsinin vacibliyini vurğulayıb. Onun sözlərinə görə, şirkətlər yalnız ikitərəfli biznes əlaqələrini inkişaf etdirməklə kifayətlənməməli, digər ölkələrin bazarlarında fəaliyyət göstərmək üçün də səylərini birləşdirməlidirlər.
Əməkdaşlığın perspektivli istiqamətləri sırasında rəqəmsal ödənişlər, maliyyə texnologiyaları, xidmətlərin rəqəmsallaşdırılması və ticarət mexanizmlərinin təkmilləşdirilməsi də yer alır. Bu məsələlər Bakıda Azərbaycan, Türkiyə və Qazaxıstan nümayəndələrinin iştirakı ilə keçirilən fintex missiyası çərçivəsində müzakirə olunub.
İşgüzar əlaqələrin möhkəmləndirilməsi və birgə layihələrin inkişafının hər iki ölkənin şirkətləri üçün əlavə imkanlar yaradacağı, onların regional və beynəlxalq bazarlardakı mövqelərini gücləndirəcəyi gözlənilir.