Azərbaycanda 2026-cı ilin yekunlarına əsasən bərpa olunan enerji mənbələrindən elektrik enerjisi istehsalının əhəmiyyətli dərəcədə artacağı gözlənilir.
Energetika nazirinin müavini Elnur Soltanov bildirib ki, cari ildə ölkədə “yaşıl enerji” istehsalı təxminən 1 milyard kilovat-saat artacaq. O, bu barədə sentyabrın 7-də Bakı İqlim Fəaliyyəti Həftəsi — Baku Climate Action Week 2026 çərçivəsində çıxışı zamanı məlumat verib.
Bərpa olunan enerji mənbələrinin inkişafı Azərbaycanın enerji siyasətinin əsas istiqamətlərindən biri olaraq qalır. Ölkədə günəş və külək enerjisindən istifadənin genişləndirilməsi, yeni enerji layihələrinin həyata keçirilməsi və müasir texnologiyaların tətbiqi istiqamətində işlər davam etdirilir.
Azərbaycan eyni zamanda regionda “yaşıl enerji” istehsalı və ixracı üzrə mühüm mərkəzlərdən birinə çevrilməyi qarşıya məqsəd qoyub.
SC Media | 7 sentyabr 2026