Azərbaycan idmançıları Rusiyada keçirilən beynəlxalq sərbəst güləş turnirində uğurlu çıxış edərək iki qızıl medal qazanıblar.
Oktyabrın 10–11-də Vladiqafqaz şəhərində Olimpiya çempionu David Musulbesin xatirəsinə həsr olunmuş beynəlxalq turnir keçirilib. Yarışda 15 ölkədən 300-dən çox gənc idmançı mübarizə aparıb.
Turnirin əsas qəhrəmanlarından biri Avropa çempionu Elvin Nəcəfzadə olub. 85 kiloqram çəki dərəcəsində çıxış edən Azərbaycan güləşçisi bütün mərhələləri uğurla keçərək fəxri kürsünün ən yüksək pilləsinə qalxıb.
Digər təmsilçimiz Cavanşir Süleymanov da uğurlu nəticə göstərib. Avropa çempionatının mükafatçısı 44 kiloqram çəki dərəcəsində rəqiblərini geridə qoyaraq qızıl medala sahib çıxıb.
Azərbaycan idmançıları yarışda U-15 millisinin böyük məşqçisi Emin Əzizov və məşqçi Elşad Allahverdiyevin rəhbərliyi altında iştirak ediblər.
Qazanılan iki qızıl medal Azərbaycanın gənc güləşçilərinin beynəlxalq arenadakı potensialını bir daha nümayiş etdirib və ölkədə sərbəst güləşin inkişafı baxımından mühüm uğur kimi qiymətləndirilib.